འཆམ་ར་མགོ་ཐོག་གི་ང་ཚོ་་་་་་་
འཆམ་ར་མགོ་ཐོག་གི་ང་ཚོ་་་་་་་
གློག་ལམ་ཡུན་གཅིག་འགག་པའི་རྐྱེན་ངན་གྱིས།།
འབའ་པ་དྲ་བར་བྱེས་བའི་མཚན་གཅིག་ཡུན།།
འཆམ་རའི་གཉའ་བར་གནོན་མཁན་མེད་པས་ན།།
བྱེད་སྟངས་འདྲ་མིན་ཞིང་ཁམས་འདི་ཉིད་དཀྲུག།
བྱིས་པས་བསྟན་བཤིག་རྩེད་པར་གཤིས་ཡིན་པས།།
དེ་མུར་བཞག་ན་སྐྱོན་མེད་ལབ་སྲིད་ཀྱང་།།
ཆུང་དུས་གོ་སྐོན་སློབ་གསོ་མ་སྤྲོད་ན།།
ལོར་སོན་བྱ་ངན་ལང་དུ་ཤོར་ཡང་སྲིད།།
ཆོས་བཟང་དྲན་རིག་རྒོད་པོའི་འགུལ་སྟངས་ལ།།
སངས་རྡོར་ལྷག་བསམ་དར་གྱིས་འདེགས་སྟངས་ཀྱིས།།
ཀུན་སྨོན་ཤམྦྷ་ལ་ཡི་ཞིང་ཁམས་ཀྱི།།
སྣོད་བཅུད་བཀོད་པ་མིག་གི་བཅུད་དུ་བབས།།
རྒྱ་བོད་རིགས་པའི་དྲག་རྩལ་ཀུན་འཇོན་གྱི།།
རྒྱར་སྡང་བོད་གཉེན་དཔའ་མོ་གངས་ལྷ་ཡིས་།།
དཔྱོད་ཤེས་གོ་ཚོན་གནས་འདིར་དྲངས་པ་ན།།
ཤམ་བྷ་ལ་ཡི་ལང་འཚོ་སྔར་ལས་དར།།
འདི་ལྟར་ལང་ཚོ་དར་པའི་ཤམབྷ་ལའི།།
གྲགས་སྙན་གོ་ལ་ཟླུམ་པོ་ཁྱུག་པ་ན།།
གཞན་གྱི་སྒོ་ཁར་ཁྱི་བཞིིན་ཉལ་པ་ཡི།།
འཆམ་ར་སྨྱོན་པ་གནས་འདིར་བསྐྱབས་བཅོལ་བསླེབས་།།
འདོད་རྒུ་ལོངས་སྤྱོད་འཛོམས་པའི་གནས་མཆོག་ནས།།
ལུས་ཀྱི་ལང་ཚོ་ཅུང་ཙམ་རྒྱས་པ་ན།།
རིགས་ལྡན་རྒྱལ་བོ་ཡེ་ཤེས་ཆོས་བཟང་དང་།།
ཉི་མ་ཤིང་རྟ་སངས་རྒྱས་རྡོ་རྗེ་སོགས།།
ཤམྦྷ་ལ་ཡི་རྒྱལ་བློན་ཐམས་ཅད་ལ།།
ངན་སྨྲས་མདའ་མཚོན་གང་བྱུང་འཕེན་བྱས་ནས།།
དམར་ཆུང་སྙིང་གི་གསང་བའི་སྦུབས་མཛོད་ནས།།
ཤམྦྷ་ལ་ཡི་རྒྱལ་སྲིད་འཕྲོག་འདོད་སྐྱེས།།
ཡོད་ཚད་མིག་གི་ངོགས་ན་བྱིས་པ་ཡི།།
གཟུགས་ཀྱི་དྭངས་མར་བཞེངས་པའི་འཆམ་ར་བ།།
སུས་ཀྱང་ཁོ་བོར་གཅེས་ལངས་བཏང་པ་ན།།
རང་ཉིད་དཔའ་བོར་སྙམ་པའི་ངར་ཞིག་ལངས།།
ཁོ་བོ་དཔའ་བོར་སྙམ་པའི་ངར་ལངས་ཀྱིས།།
ཤམ་བྷ་ལ་ཡ་ལག་སྟེང་ཡོད་སྙམ་སྐྱེས།།
འདི་ལྟར་ལོག་ཤེས་ཕྲ་མོའི་་འགུལ་སྟངས་ཀྱིས།།
ལ་ལུང་ཡོད་ཚད་ཀི་སྒྲ་བསོ་སྒྲས་དཀྲོག
འོན་ཀྱང་དེ་དག་རྨི་ལམ་རང་ཡིན་པས་།།
གཉིད་ཀྱི་ཞིང་ནས་མགྱོགས་པོར་ཡར་ལྡང་ནས།།
ཁྱེད་ཀྱི་མགོ་བོ་སྟེང་གི་བེར་འབའ་དང་།།
གངས་ལྷ་མཛེས་མའི་ཞལ་གྱི་དཀྱིལ་འཁོར་སོགས།།
ཡོད་ཚད་དད་པའི་ངོགས་སུ་དྲངས་བྱས་ནས།།
རིགས་པའི་དངོས་གྲུབ་དུས་ནས་དུས་བསླང་དང་།།
ལྷ་མཆོག་གང་དག་མཉེས་བཞིན་བཟུང་སོང་ན།།
ཁྱེད་ཉིད་མུན་པའི་གླིང་ནས་གྲོལ་ཡང་སྲིད།།
རང་ཉིད་རང་གིས་བཀྱགས་པའི་བྱ་ཚུལ་དེ།།
གཞན་གྱི་རྐང་འོག་ཡོད་པའི་དཔང་རྟགས་ཡིན།།
རང་ཉིད་གནམ་ཐོག་ཡོད་པའི་རྨི་ལམ་དེ།།
ད་ལྟར་བྱིས་པ་ཡིན་པའི་གཏན་ཚིགས་ཡིན།།
དེ་རིང་བྱ་བྱེད་ཅུང་ཟད་འཚུབ་ན་ཡང་།།
བྱིས་པར་གོ་ཡངས་བཏང་པའི་རྩ་ཁྲིམས་འོག
དེ་རིང་ཐེངས་གཅིག་ཚེ་ཐར་བཏང་ཡོད་པས།།
རྗེས་སུ་འདི་ལྟར་བྱ་ན་གནང་བ་མེད།།
བྱིས་པ་སོན་རྒྱུ་མེད་པའི་འཆམ་ར་བ།།
ཁ་ལ་བདག་པོ་མེད་པའི་འཆམ་ར་བ།།
རྨི་ལམ་མངོན་སུམ་བཏགས་པའི་འཆམ་ར་བ།།
ལག་པ་སྡོད་རྒྱུ་མེད་པའི་འཆམ་ར་བ།།
ཁྱེད་ཀྱིས་ཞིང་ཁམས་འདི་ཉིད་དཀྲོག་ན་ཡང་།།
གངས་ལྷ་བེར་སོགས་ཁྱེད་ཀྱི་མགོ་ཐོག་གི།།
སེམས་དཔའ་གང་དག་ཁྱེད་ལ་སྙིང་རྗེ་ནས།།
མ་མཐོང་བཏང་སྙོམས་གནས་སུ་བཞུགས་ན་ཡང་།།
བྱིས་པའི་འཚུབ་ཁ་གཤིས་ཀར་ཐིམ་དོགས་ཀྱིས།།
སེམས་ཁྲལ་ཨུ་ཚིགས་བརྒྱ་ཡིས་སྐུལ་ལུགས་ཀྱིས།།
འབའ་པའི་བུ་རྒོད་ལྡིང་སྐོར་བྱེད་ཞོར་དུ།།
ལྕགས་ཚན་དཀར་པོས་མགོ་ལ་ལན་གཅིག་བྲབས།།
དགུང་ཇ་འཐུང་ཞོར་ཤར་མར་བྲིས་ནས་དྲ་ཐོག་སྤེལ་པའོ།