དགའ་རོགས་ཟ་ཁང་

October 24, 2010
དགའ་རོགས་ཟ་ཁང་

                            ཁ་བ་བབས་པའི་རྗེས་ལ།། ཁ་ཤུལ་ཉི་མ་དྲོ་བྱུང་།།

ཁ་བ་བབས་པའི་རྗེས་ལ།།ཁ་ཤུལ་ཉི་དྲོ་བྱུང་།ཟེར་བའི་གནའ་མི་ཡི་གཏམ་དཔེ་དེ་ཅི་མི་བདེན།ཉིན་མཚན་བསྟུན་མར་ཁ་བའི་མལ་གོས་ཁྲོད་དུ་གཟིམ་པའི་དྷ་སའི་རི་གྲོང་ཡང་།དེ་རིང་སེར་ལམ་ལམ་གྱི་ཉི་ངོགས་སུ་སྤྲོ་མདངས་ཤིག་མངོན་བཞིན་འགྱིང་འདུག།དྲོད་ལམ་ལམ་གྱི་ཉི་ངོགས་སུ་ཡུན་རིང་བག་ལ་ཞར་བའི་མི་ཚོགས་ཀྱང་བྲེལ་འཚུབ་འཚུབ་ངང་ཡར་འགྲོ་མར་འགྲོ་བྱེད་བཞིན་མཆིས།  ང་དང་རྩོམ་པ་པོ་ལི་ཐང་བློ་བརྟན་གཉིས་ཀྱང་ལས་དོན་ཞིག་གི་ཕྱིར་དུ་དྷ་སའི་རི་གྲོང་བརྒལ་ནས་གངས་ཅན་སྐྱིད་གཤོངས་སུ་ཕྱིན།   

                      གངས་ཅན་སྐྱིད་གཤོངས་སུ་བསྒྲུབ་དགོས་པའི་ལས་དོན་རྣམས་བསྒྲུབས་ཟིན་ནས་ཟ་ཁང་ཞིག་ཏུ་ཉིན་དགུང་ཁ་ལག་ཟ་བར་སོང་།ཟ་ཁང་དེ་ཏག་ཏག་སྤྱི་འཐུས་ཚོགས་ཁང་གི་རྒྱབ་ལོགས་དེར་འདུག་པས་ང་གཉིས་ལ་མཚོན་ན་ཐག་རིང་པོར་འགྲོ་མི་དགོས་པར་གྲོད་ཁོག་ལྟོགས་གདུང་སེལ་ཐུབ་པས་དེ་ལས་ཡག་པར་ཅི་ཡང་མ་མཐོང་།སྤྱིར་ཆ་མེད་ང་ལྟ་བུར་མཚོན་ན་ཟ་ཁང་འདི་སུ་ཚང་གི་ཡིན་མིན་ཅི་ལྟར་ཤེས་མོད་ཟས་ཐོ་ལ་བལྟས་དུས་གནས་ཆུང་གི་ཟ་ཁང་ཞེས་བཀོལ་འདུག་པས་དེ་གནས་ཆུང་གི་ཟ་ཁང་ཡིན་ཐག་ཆོད་རེད། ཟ་ཁང་འདི་ནི་དྷ་སའི་ཟ་ཁང་བྱིངས་དང་མི་འདྲ་བར་རིན་གོང་ཧ་ཅང་དམའ་མོ་སྟེ།འབྲས་དང་བག་ལེབ་ཚོད་མ་བཅས་གྲོད་པ་རྒྱག་རག་བར་དུ་བཟས་ནའང་ཧིན་སྒོར་༡༥ལས་མི་དགོས། དེར་བརྟེན་འདི་རུ་རྒྱ་གར་གྱི་འགྲུལ་སྐྱེལ་རླངས་འཁོར་ལྟར་འཚང་ཁ་བཤིག་བཤིག་རེད།ང་གཉིས་ཀྱང་ཅུང་སྒུག་རྗེས་རྐུབ་སྟེགས་སྟོང་པ་ཞིག་རེག་བྱུང་།འབྲས་ཚོད་སྡེར་མ་རེ་མངགས་ནས་ཉིན་ཟས་ལ་རོལ། ང་གཉིས་རྒྱབ་ཀྱི་རྐུབ་སྟེགས་སྟེང་དུ་ཚགས་ཤོག་སོགས་གསར་ལམ་ཁག་ནས་སྔར་ནས་མཐོང་མྱངས་པའི་གཞུང་ཞབས་སྐུ་ངོ་ག་གེ་མོ་ཞིག་དང་ལོ་ན་བཞི་བཅུ་ནས་ལྔ་བཅུ་བར་ཡིན་ཚོད་ཀྱི་ཨ་ཅག་གཉིས་ཉིན་ཟས་ལ་རོལ་གྱིན་གྱིན་ལབ་གླེང་འདྲ་མིན་ལ་བྱེད་ཀྱི་འདུག ཨ་ཅག་ལགས་དེའི་མིག་ནསམཆི་མ་བཞུར་བཞིན་ངའི་ཅོག་ལགས་ཀྱིས་ཁྱེད་དང་མཉམ་འགྲོགས་པར་ཤེས་ནས་བརྡུངས་རབས་སོགས་གསལ་ལ་མི་གསལ་བའི་སྐད་ཆ་བཤད་ཞོར་ངུ་ཞོར་བྱེད་ཀྱི་འདུག སྐུ་ངོ་ལགས་དེས་ངོ་ཡག་དང་ཁ་ཡག་ཇི་ལྟར་བྱས་ཀྱང་ཉན་འཇོག་གཏན་ནས་མི་བྱེད་པར་མ་ཟད།དེ་ལས་ངུ་ཤུགས་ཆེ་རུ་ཕྱིན། སྐུ་ངོ་དེས་འཚབ་འཚུབ་ངང་མིག་གཡས་གཡོན་གྱི་མགྲོན་པོ་དག་ལ་ཉུལ་གྱིན་དོགས་མི་བདེ་བའི་ངང་ཚུལ་ཞིག་གདོང་ལ་མངོན་བཞིན་སྐད་འགོ་དམའ་པོའི་ངང་ནས་སྐུ་མཁྱེན་ད་མ་ངུ་དང་  ང་ཡི་ཟླ་བ་གཅིག་གི་གླ་ཕོགས་ཡོད་ཚད་སྤྲོད་ཆོག ཡིད་བཞིན་རྒྱལ་བ། ཞེས་ཟེར། དེ་ནས་ཅུང་མ་འགོར་བར་གང་གིས་རྐྱེན་ཡིན་མི་ཤེས་མོད། ཨ་ཅག་དེའི་མིག་ཆུའི་མཚམས་བཅད་ནས་གདོང་ལ་ཨུ་ཚུགས་ཀྱི་འཛུམ་ཆུང་ཞིག་མངོན་བཞིན་བུ་དེའི་རྗེས་སུ་འབྲངས་ནས་ལོག་སོང་ 

     དེ་ནས་ང་ཡི་ལོགས་ཀྱི་སྐུབ་སྟེགས་སྟེང་གི་ཕོ་གསར་དེས་ང་ལ་ཕྱོགས་ནས་ཁམས་སྐད་དང་དབུས་སྐད་འདྲེས་མའི་ཐོག་ནས་རྒན་ལགས་ཟ་ཁང་འདི་དགའ་རོགས་ཟ་ཁང་རེད་ལ། ད་དུང་གཡུལ་བོར་ས་ཡི་ཟ་ཁང་ཀྱང་རེད་ཟེར།  དགའ་རོགས་ཟ་ཁང་ཟེར་བ་ཅི་ཞིག་དོན་དུ་ཡིན་པར་འགྲེལ་བཤད་མི་དགོས་པར་གསལ་ཐིང་ཐིང་ངེས་ཀྱང་  གཡུལ་བོར་སའི་ཟ་ཁང་ཡིན་པར་ནང་སླེབས་ནས་ཟིན་ཐོ་དེ་འབྲི་སྐབས་མ་གཏོགས་ཤེས་མ་སོང་།དེ་ནི་ཕལ་ཆེར་སྤྱི་འཐུས་ཚོས་ཚིག་རྩོད་རྒྱག་རྒྱག་ནས་རྣ་གཡོལ་འགྲོ་ས་ཡིན་པས་རེད་སྙམ།  

༢༠༡༠ ་༢ ་ ༡༢ཉིན་གངས་སྐྱིད་དུ་བྲིས།
 

སློབ་གྲྭའི་བུ་མོ་ཚོའི་བདག་པོ་གྲྭ་བ་ཡིན་ དགོས

October 24, 2010
སློབ་གྲྭའི་བུ་མོ་ཚོའི་བདག་པོ་གྲྭ་བ་ཡིན་ དགོས

དེང་སྐབས་ནི་སློབ་གྲ་འཛིན་གྲ་ བཅུ་གཅིག་བཅུ་གཉིས་རྣམས་གུང་གསེང་དུ་ཡོང་པའི་དུ་ཚོད་རེད། གཞིས་གྲོང་ཁག་དང་རྒྱ་ལམ་དག་ན་གྲྭ་བ་རེས་...


Continue reading...
 

Tags

Categories

Blog Archive

 

This free website was made using Yola.

No HTML skills required. Build your website in minutes.

Go to www.yola.com and sign up today!

Make a free website with Yola